Acts 20

Udlula EMakhedoniya LaseGirisi

1Kwathi umsindo usuphelile uPhawuli wabiza abafundi, wathi esebakhuthazile wabavalelisa waqonda eMakhedoniya.

2Wahamba wadabula kulowommango, ekhuluma amazwi amanengi okukhuthaza abantu, wacina esefike eGirisi 3lapho ahlala khona okwezinyanga ezintathu. AbaJuda bakha icebo ngaye eselungele ukuwela aye eSiriya yikho wasezimisela ukuthi abuyele ngendlela yaseMakhedoniya. 4Wayephelekezelwa nguSophatha indodana kaPhirusi waseBheriya, lo-Aristakhu, loSekhundu waseThesalonika, loGayu waseDebhe, loThimothi laye, kwasekusiba nguThitshikhu loThrofimu abesifunda sase-Asiya. 5Amadoda la asandulela ayasimelela eThrowa. 6Kodwa sawela ulwandle sisuka eFiliphi ngemuva komkhosi weSinkwa Esingelamvubelo, kwathi ngemuva kwezinsuku ezinhlanu sahlangana labanye eThrowa lapho esahlala khona izinsuku eziyisikhombisa.

UYuthikhu Uvuswa Ekufeni EThrowa

7Ngosuku lokuqala lweviki sahlangana ukuhlephula isinkwa. UPhawuli watshumayela ebantwini, kwathi ngoba efuna ukusuka ngakusasa, wakhuluma kwaze kwaba phakathi kobusuku.

8Endlini ephezulu lapho esasihlanganele khona kwakulezibane ezinengi.

9Kwakulejaha elalithiwa nguYuthikhu lihlezi ewindini, labanjwa yibuthongo uPhawuli elokhu ekhuluma engaqedi. Lathi selibubhudla ubuthongo, lawela phansi lisuka esitezi sesithathu labuthwa selifile. 10UPhawuli wehla, wazilahla phezu kwejaha lelo waligona wathi, “Lingethuki, liyaphila!” 11wasebuyela phezulu esitezi wahlephula isinkwa wadla. Esekhulume kwaze kwasa, wasuka. 12Abantu balisa ekhaya ijaha liphila, bona baduduzeka kakhulu.

UPhawuli Uvalelisa Abadala Base-Efesu

13Sahamba phambili saya emkhunjini sawelela e-Asosi lapho esasizathatha khona uPhawuli awele lathi. Lokhu wayekulungisile ngoba wayezahamba ngezinyawo esiya khonale. 14Wathi ngokuhlangana lathi e-Asosi samngenisa saqonda eMithilene. 15Ngosuku olulandelayo sawela sisuka lapho sayafika eKhiyosi. Kwathi ngosuku olulandelayo sachaphela eSamosi, ngosuku olulandelayo sayafika eMilethu. 16UPhawuli wayezimisele ukuwela edlule eceleni kwe-Efesu engafuni ukuchitha isikhathi esifundeni sase-Asiya, ngoba wayejahile ukuyafika eJerusalema, uma kusenzeka kube ngosuku lwePhentekhosti.

17EseMilethu uPhawuli wathumela ilizwi ebiza abadala bebandla. 18Sebefikile wathi kubo: “Liyakwazi ukuthi ngaphila njani ngesikhathi sonke ngilani, kusukela ngosuku engafika ngalo esifundeni sase-Asiya.

19Ngayikhonza iNkosi ngokuzithoba okukhulu langezinyembezi, loba ngangilingwa kabuhlungu ngamacebo abaJuda. 20Liyakwazi ukuthi kangizange ngithikaze ukutshumayela loba yikuphi obekungaba luncedo kini kodwa ngalifundisa obala njalo ngingena izindlu ngezindlu. 21Ngimemezele kumaJuda lamaGiriki ukuthi bamele baphendukele kuNkulunkulu ngokuphenduka, ba-kholwe eNkosini yethu uJesu.

22“Okwamanje ngiqhutshwa nguMoya ukuthi ngiye eJerusalema, loba ngingazi ukuthi kuzakwenzakalani kimi khonale. 23Ngazi kuphela ukuthi kuwo wonke amadolobho uMoya oNgcwele ungixwayisa ukuthi ngizulelwa yintolongo lobunzima. 24Kungenani, eyami impilo ngiyibona ingasulutho kimi, uba kodwa lokhu ngingaliqeda ibanga ngiwufeze lomsebenzi iNkosi uJesu engiphe wona – umsebenzi wokufakaza ivangeli lomusa kaNkulunkulu.

25“Khathesi ngiyazi ukuthi kakho kini engihambe ngitshumayela khona umbuso ozaphinda angibone futhi. 26Ngakho ngiyafakaza kini lamuhla ukuthi kangilacala ngegazi labantu bonke. 27Phela kangithikazanga ukutshumayela kini yonke intando kaNkulunkulu. 28Zilindeni lina kanye lawo wonke umhlambi uMoya oNgcwele olenze laba ngabaqapheli bakhe. Wobani ngabelusi bebandla likaNkulunkulu, alithenga ngegazi lakhe. 29Ngiyazi ukuthi nxa sengisukile lapha, izimpisi eziphangayo zizakuza phakathi kwenu ziwungenele umhlambi. 30Laphakathi kwenu kuzavela abantu abazalihlanekela iqiniso ukuze babuyele kubo abanye abafundi. 31Ngakho lihlale liqaphile! Khumbulani ukuthi okweminyaka emithathu kangizange ngiphumule ukuxwayisa omunye lomunye wenu ebusuku lemini ngezinyembezi.

32“Khathesi ngilinikela kuNkulunkulu laselizwini lomusa wakhe elilamandla okulakha lokulipha ilifa phakathi kwalabo bonke abangcwelisiweyo. 33Kangihawukelanga siliva samuntu, loba igolide kumbe izembatho. 34Lina ngokwenu liyakwazi ukuthi izandla zami lezi zapha zonke iziswelo zami leziswelo zabakhula bami. 35Kukho konke engakwenzayo ngalibonisa ukuthi ngalendlela yokusebenza nzima kumele sisize ababuthakathaka, sikhumbula amazwi eNkosi uJesu athi: ‘Ukupha kubusisekile okudlula ukwamukela.’ ”

36Esekutshilo lokhu waguqa phansi kanye labo bonke wakhuleka. 37Bonke bakhala lapho babemgona njalo bemanga. 38Okwabadanisa kakhulu kwaba yilizwi lakhe lokuthi babengasayikuphinde babubone njalo ubuso bakhe. Yikho base bemphelekezela emkhunjini.